Forum libero

LA STELLA DIANA6
Dal sito
http://www.intratext.com/IXT/ITA3496/_P6.HTM

Gh'era ona voeulta on spezièe, che el gh'aveva ona tosa7. L'era vedov, el gh'aveva minga mièe8. El ghe voreva tanto ben a sta soa tosa; e lee, l'andava a imparà a cusì de biancheria in d'ona soa amisa. E sta soa amisa, ghe piaseva tanto i fior; la gh'aveva ona terrazza; e tutti i dopodisnàa9 l'andava a dacquà sti fior; e per contra gh'era on poggioeu10 e gh'era semper là on scior. Lu el saveva, che lee, la gh'aveva nomm: Stella Diana. El ghe diseva: - «Stella Diana, quanti foeuj11 fa la soa maggiorana?» - E lee, la ghe dis: - «E lu, sur nobil cavalier, quante stelle gh'è in del ciel?» - Lu, el dis: - I stell che gh'è in del ciel non se pol contare.» - E lee, la ghe dis: - «La mia maggiorana non si può rimirare.» - E lu, el gh'aveva tant piasè de vedella de visin sta tosa, l'è andaa intes con quella dove l'era in casa lee; el s'è vestìi e l'ha fint de vess on pessee12, de andà là a vend el pess. Quella dove l'era in casa da laorà13, la ghe dis: - «Famm el piasè a toeu de quel pessin.» - E la ghe dis: cosse l'è ch'el voreva. E lu, el gh'ha domandàa on prezzi carissim. E lee, la gh'ha ditt che le voreva minga, che l'era tropp car. E lu, el gh'ha ditt de fagh on basin, ch'el ghe dava el pessin. S'ciao! lee, la gh'ha fàa el basin, e lu, el gh'ha dàa el pessin. Al dopdisnàa la torna anmò su la terrazza; e lu, el ghe torna a dì: - «Stella Diana, quanti foeuj fa la soa maggiorana?» - E lee, la ghe dis: - «E lu, sur nobil cavalier, quante stelle gh'è in del ciel?» - E lu, el dis: - «I stell che gh'è in del ciel non se pol contare.» - E lee, la ghe dis: - «La mia maggiorana non se può rimirare.» - E lu, el ghe dis: - «Per on pessin, la m'ha faa el basin.» - Lee, l'era rabiada perchè el gh'ha fàa sto scherz; e lee, la pensava de faghen vun a lu. L'ha miss ona bellissima zenta14 in vita, magnifica, e l'ha ciappàa ona mula, e l'è andada a cavall e l'è passada via dove el stava lu, a posta pe fass vedè, che la gh'aveva sta zenta inscì preziosa. E lu, l'ha veduda e l'ha ditt: - «Oh che bellezza d'ona zenta! come me piasaria, che la fuss mia!» - L'è andàa de bass, e gh'ha ditt cosse l'è ch'el voreva (perchè l'era vestida de omm) per quella zenta. E lu (che l'era lee vestida de omm) l'ha ditt15: che lu le vendeva minga; che chi ghe faseva on basin in del cùu alla soa mula, el ghe dava la zentura. S'ciao! e lu, l'ha guardàa, l'ha vedùu che gh'era nissun attorno e la zenta la ghe piaseva tant, el gh'ha fàa el basin, e l'ha ciappàa la soa zenta e via! l'è scappàa via subet. Al dopdisnàa tornen de capp: lee, in su la soa terrazza, e lu, in sul poggioeu. E lu, el ghe dis: - «Stella Diana, quanti foeuj fa la soa maggiorana?» - E lee, la ghe dis: - «E lu, sur nobil cavalier, quante stelle gh'è in del ciel?» - Lu, el dis: - «I stell che gh'è in del ciel non se pol contare!» - E lee, la ghe dis: - «Anca la mia maggiorana non si può rimirare!» - E lu, el ghe dis: - «E per el pessin, la m'ha faa el basin.» - E lee, la ghe dis: - «E per la zentura, el gh'ha basàa el cùu a la mia mulla16.» - Quand l'ha sentìi, che lee, la gh'ha faa sto desprèsi17, allora lu el pensa de faghen on alter anmò a lee. L'è andaa in dove l'era in casa lee a laorà e l'è restaa intèe de fagh on scherz. Al dopdisnàa, lee, l'ha faa per andà a cà, quand l'è in su la scala, gh'è i basej18 con denter di sfor, di bus, che l'è la scala che sott ghe resta la cantinna. El se prepara là e menter che la passava el cascia su la man e el ghe tira la vesta. Lee, la diseva: - «Sura maestra, la scala mi tira, la scala mi lascia: gh'è nissun che mi abbraccia?» - Lee, la maestra, l'amisa, la diseva: - «Va, va, che la scala ti lascerà.» - Lee, adess la s'è ammalada e l'è stada on poo de temp senza podè andà a la soa scola. Dopo l'è andada e torna la stessa storia sulla terrazza. Lu, el ghe dis: - «Stella Diana, quanti foeuj fa la soa maggiorana?» - E lee, la ghe dis: - «E lu, sur nobil cavalier, quante stelle gh'è in del ciel?» - E lu, el ghe dis: - «I stell che gh'è in del ciel non se pol contare.» - E lee, la ghe dis: - «Anca la mia maggiorana non si può rimirare.» - E lu, el ghe dis: - «Per el pessin, la m'ha faa el basin.» - E lee, la ghe dis: - «Per la zentura, l'ha basàa el cùu a la mia mula.» - E lu, el ghe dis: - «Sura Maestra, la scala mi tira, la scala mi lascia; gh'è nissun che mi abbraccia? Va, va, che la scala ti lascerà.» - Lee, la sent sti robb tutta rabbiada, la pensa de faghen vunna pussèe19 bella. Donca la va a cà del so papà e la ghe dis de faghel sto piasè, de dagh di danèe: - «ma tanti, perchè ghe n'hoo de bisogn.» - Lu, el ghe dis: - «Cosa te n'hê de fann?» - Lee, la dis: - «Tel diròo, quand gh'avaròo faa, quel che gh'hoo intenzion de fà mi.» - E l'è andada e l'ha pagaa di servitor de la casa in dove el stava lu, per lassalla entrà ona sera in di stanz in dove stava el so padron. E lee, la s'è missa on lenzoeu in testa, bianch; ona gran torcia in man e on liber; e al moment che l'entrava in stanza de lu l'ha pizzaa sta torcia. E lu, a vedè sta fantasma tutt'on tratt, con sto ciar a comparì, el s'è stremìi. - «Questa l'è l'ultima ora de la toa vita: ti te devet morì!» - E lu, tutt stremìi, el diseva: - «Morte mortina, lasciami stare, che son giovinetto; va da mio padre ch'è più vecchio di me!» - E lee, la ghe diseva: - «No, questo è il tuo momento e non è il momento di tuo padre!20» - E poeu l'ha smorzaa21 la soa torcia, e via la gh'è scomparsa. Lu, el pessèga, el sona el campanin e el dimanda la servitù tutt stremìi con paura: el fatt l'è che l'ha faa ona malattia de la gran paura che l'ha ciappàa e l'è stàa tanto temp in lett. Quand l'è andaa ancamò in sul so poggioeu, l'ha veduu la Stella Diana. Lu, el ghe dis: - «Stella Diana, quanti foeuj fa la soa maggiorana?» - E lee, la ghe dis: - E lu, sur nobil cavalier, quante stelle gh'è in del ciel?» - E lu, el ghe dis: - «I stell che gh'è in del ciel non se pol contare.» - E lee, la ghe dis: - «Anca la mia maggiorana non si può rimirare.» - E lu, el ghe dis: - «Per el pessin, la m'ha faa el basin.» - E lee, la ghe dis: - «Per la zentura, l'ha basaa el cùu a la mia mulla.» - E lu, el ghe dis: - «Sura maestra, la scala mi tira, la scala mi lascia; gh'è nissun che mi abbraccia? Va, va, che la scala ti lascerà.» - E lee, la ghe dis: - «Morte mortina, lasciami stare che son giovinetto! va da mio padre ch'è più vecchio di me.» - E lu, el sent che la gh'ha faa sto scherz, el dis: - «La m'ha fàa de sti azion! Adess me vendicaròo mi deversament.» - El va e le cerca al so pa per sposalla. E lu, el so pader, el ghe dis che l'è impossibel perchè l'è fioeu del Re. E lee, la tosa, la ghe dis a so papà: - «Lassa pur ch'el me sposa; mi el sposi subet volentera.» - Donca fann el contratt. Fissàa el dì di sposalizi, lee, cosa l'ha faa, lee? La pensa de fa on'altra robba innanz che l'avess avùu de sposalla, fa fà ona gran pigotta22 granda, le mett in camisa cont on gipponin de lett23 e la gh'ha faa mett ona vessiga, chì, in del stomegh, piena de lacc24 e vin e zuccher. Poeu la sera che l'è andada a cà dopo sposada, lee, la gh'aveva scondùu la soa pigotta in d'on vestee25. Intrettant ch'el passeggiava in stanza, che lee la se disvestiva per andà in lett, la gh'ha miss in lett la pigotta. E lee, la s'è sconduda. E lu al va là, cont on stil: - «Ah!» - el dis - «adess me vendighi mi! Quest chì, l'è propi el to ultim moment, e l'è minga el mè.» - El ghe dà ona stillettada in de la vessiga: la, l'ha credùu de daghela in del coeur, e gh'è andaa on poo de sto vin e lacc dolz in bocca: - «Oh poer a mi! come l'è dolz el sangue della mia Stella Diana! Poer26 a mi! coss'hoo mai fàa!» - a piang tutt desperaa. - «L'è vera che sont on Re; ma se fuss el Re de tutt i Re, la mia Stella Diana la farìa diventa viva anmò!» - Lee, l'ha lassaa piang desperàa. E poeu l'è vegnuda foeura e la gh'ha ditt; - «No, sont chi ancamò. La toa Stella Diana l'è minga morta.» - S'ciao! lu, dopo el gh'ha voruu ben; e lee, l'è stada soa mièe.